એક યાદ છું

રણમાં ભૂલી પડેલ એક રાહદાર છું,
તમારા પ્યારની એક બુંદ માટે તલસી રહેલ પ્યાસ છું.
હવાની લેહરખી ના મળે તેવી પાનખર છું,
પામ્યા પછી મુલ્ય ના રહે તેવું જર્ણજળ છું.
ખરી જાય રાહતના પાન જ્યાં એવી એક પળ છું.
ના તલાશો મારી આ નિરસ જીંદગીને,
કોઈ ભર ચોમાસે અટકાયેલ અનાવૃષ્ટિ છું.
ના કોઈ આવશો મારી આ ખાલી દુનિયાની ભીતર,
દિલાસાનો આધાર લઈ જીવવાનો એક આત્મા છું.
પાગલ મને શોધવા આમ-તેમ ફાંફાં ના મારશો,
તમારા દિલમાં જડી રહેલ એક યાદ છું.
મીના પરમાર
(ઠુમરાલ-નડિયાદ)

જીગરજાન દોસ્ત

આસું હોય મારી આંખમાં તો એ રડી પડે છે,
મારી એક ખુશી માટે એ બધાં સાથે લડી પડે છે.
મંઝીલનાં એક-એક મુકામે જ્યારે પણ
એની જરૂર પડે છે.
સાથ આપવા મારો એ હંમેશા તૈયાર રહે છે,
ઘણી વાતો આ મન બધાંથી છુપાવવા ઈચ્છે છે.
એ એક છે જે મારી આંખોથી બઘું વાંચી લે છે,
મારી પસંદ, ના પસંદ એનાથી વધારે કોણ જાણે છે?
અવનવા ઉપાયોથી હંમેશા મને ખુશ રાખે છે.
હું હોઉં ખુશમિજાજ માં તો એ પણ મહેંકી ઊઠે છે,
મારી એક હસીમાં પોતાનાં સેંકડો ગમ છુપાવી દે છે.
કેવી છે આ ગાંઠ પ્રીતની જે સાથે ન રહેવા છતાં
પણ બાંધી રાખે છે.
હા.....એજ એની દોસ્તી જે બધાંથી પ્યારી લાગે છે.
જ્યોતિ ઐલેષ ગાંધી
(મોરબી)

એમ પૂછીને થાય નહીં પ્રેમ.

દરિયાના મોજાં કંઇ રેતીને પૂછે, ‘તને ભીંજાવું ગમશે કે કેમ ?’;
એમ પૂછીને થાય નહીં પ્રેમ.

ચાહવા ને ચૂમવામાં ઘટનાનો ભેદ નથી, એકનો પર્યાય થાય બીજું;
આંખોનો આવકારો વાંચી લેવાનો, ભલે હોઠોથી બોલે કે, ખીજું ?
ચાહે તે નામ તેને દઇ દો તમે રે ભાઇ અંતે તો હેમનું હેમ;
એમ પૂછીને થાય નહીં પ્રેમ.

ડગલે ને પગલે જો પૂછ્યા કરો તો પછી કાયમના રહેશો પ્રવાસી;
મન મૂકી મ્હોરશો તો મળશે મુકામ એનું સરનામું, સામી અગાશી.
મનગમતો મોગરો મળશે, વટાવશો વાંધાની વાડ જેમજેમ;
એમ પૂછીને થાય નહીં પ્રેમ. 

- તુષાર શુક્લા

શોધતો રહ્યો

શોધતો હતો ફૂલ ને ફોરમ શોધતી હતી, મને,
એકબીજાને શોધતાં ગયાં દૂર, તો આવ્યાં કને.
કયાંક રે આંબો ટહુકયો, એની વનમાં મહેકી વાત,
કમળ જેવો ખીલતો દિવસ, પોયણા જેવી રાત.
શોધતો રહ્યો ચાંદ ને રહી ચાંદની શોધી મને,
એકબીજાને શોધતાં ગયાં દૂર, તો આવ્યાં કને.
આંખ મીંચું ત્યાં, જૂઈનું ગાલે અડતું ઝાકળફૂલ,
મનમાં હળુક લ્હેરવા લાગે
વ્યોમની કિરણ-ઝૂલ.
શોધતો જેવી પગલી એનો મારગ શોધે મને,
એકબીજાને શોધતાં ગયાં દૂર, તો આવ્યાં કને.

-ચંદ્રકાંત શેઠ

અમે કરીશું પ્રેમ..

રાત દિવસનો રસ્તો વ્હાલમ, નહીંતો ખૂટે કેમ?
તમે પ્રેમની વાતો કરજો, અમે કરીશું પ્રેમ
તમે રેતી કે હથેળી ઉપર લખો તમારું નામ,
અમે એટલાં ઘેલાં ઘાયલ નહીં નામ કે ઠામ.
તમને તો કોઈ કારણ અમને નહીં
બ્હાના નહીં વ્હેમ,અમે કરીશું પ્રેમ..
તમને વાદળ ધુમ્મસ વ્હાલાં,
અમને ઉજળી રાત;
અમે તમારાં ચરણ ચૂમશું થઈને પારીજાત.
કહો આંખથી ગંગા જમના વહે એમ ને એમ,
અમે કરીશું પ્રેમ..

-સુરેશ દલાલ

... તો પ્રેમ કરો

દર્દ ઝીલવાની તાકાત હોય, તો પ્રેમ કરો,
નવા મોતે મરવાની આદત હોય, તો પ્રેમ કરો.
મહેફીલો પણ વેરાન વગડા જેવી લાગશે,
વિરહ જોડે તમારે સંગત હોય, તો પ્રેમ કરો.
મૃગજળને પામવા જતાં અંતે મરણ થશે,
આંખોને આંસુ સાથે ચાહત હોય,
તો પ્રેમ કરો.
હૃદય પર ખંજર ભોંકાશે યાદોની હરપળ,
રડવા માટે જગા એકાંત હોય, તો પ્રેમ કરો.
‘‘સખી’’ને સમજાઈ ગઈ છે પ્રેમની પરિભાષા,
દુઃખોથી બચવા કોઈ રીત હોય, તો પ્રેમ કરો.

પંિકલકુમાર જે.પરમાર ‘‘સખી’’
(મેનપુરા-બાલાશિનોર)

આરજુ….!!!

તમારી યાદને બસ હું દિલથી ભુલાવી ના શક્યો..!
ને…! દિલ ની દુનીયાને ફરીથી વસાવી ના શક્યો…!!
ખબર તો હતી જ કે ત્યાં નથી કોઈ મંઝિલ મારી…
…પણ મારી એ રાહ ને હું બદલાવી ના શક્યો…!
તમારી આ… યાદે… તો કેટલા કર્યા છે બેહાલ અમને ..!
કે ખુદ મારા જ પ્રતિબિંબ ને હું જ પિછાણી ના શક્યો !!!
આમ તો , સામે જ વેરાણું હતુ આંસુઓનુ સમંદર …..
લાચાર હતો, મારી જ પ્યાસ ને હું બુઝાવી ના શક્યો
આમ તો હતી ઘણી જગ્યા આ નાનકડા દિલમાં…
પણ બે બુંદ તમારા પ્રેમના હું સમાવી ના શક્યો…
કે અશ્રુ વાટે વહેવડાવી દીધા મે તમને…’અંકુર’
દિલમાં તો શું ? બે ક્ષણ આ નયન માં પણ વસાવી ના શક્યો…!!!
- હસમુખ ધરોડ ‘અંકુર’

તમને સમય નથી અને મારો સમય નથી

“દિલનાં દર્દને અશ્રુથી તોલી શક્યા નહીં,
હૈયું પરસ્પર આપણે ખોલી શક્યા નહીં;
જાલિમ જમાનો બેઉની વચ્ચે હતો એથી,
સામે મળ્યા ને કાંઈ પણ બોલી શક્યા નહીં.”
તમને સમય નથી અને મારો સમય નથી,
કોણે કહ્યું કે આપણી વચ્ચે પ્રણય નથી.
રોકી રહી છે તમને તમારી શરમ અને,
મારા સિવાય મારે બીજો કોઈ ભય નથી.
વિસરી જવું એ વાત મારા હાથ બહાર છે,
ને યાદ રાખવું એ તમારો વિષય નથી.
હું ઇન્તિજારમાં અને તમે હો વિચારમાં,
એતો છે શરૂઆત કંઈ આખર પ્રલય નથી.
- બાપુભાઈ ગઢવી

કૈં નથી…

બાકી શરીર કૈં નથી ચહેરો છે દોસ્તો
ઓળખ, અટક ને નામનો પહેરો છે દોસ્તો
માણસ સુધી તો કઈ રીતે પહોંચી શકે કોઈ
દેખાય તેથી પણ વધુ ગહેરો છે દોસ્તો
ક્યાં એ અવાજ સાંભળી પડઘાય છે જરા
માણસ ખુદાથી પણ વધુ બહેરો છે દોસ્તો
એકાંત છેક તળિયે મળે તો મળી શકે
ડૂબી જવાય એટલી લહેરો છે દોસ્તો
-નયન દેસાઈ

અર્થ નથી...

હવે તને જોવાનો કોઈ અર્થ નથી,
મને સમજી શકે એવું તારૂ દિલ નથી.
તું તરછોડ્યા કરે અને હું ચાહ્યા કરૂં,
એ હવે મને મંજુર નથી.
ભલે હું હાર્યો અને તું જીતી પણ,
મારી હાર જેવો દમ તારી જીતમાં નથી.
નસીબદાર છે એ કે જેને તું મળી,
પણ એમાં હું શું કરી શકું?
તને પામી શકું એવી એકેય રેખા,
મારા હાથમાં નથી.
હું જોઉં તને, તું જુએ કોઈ બીજાને,
તેથી જ તને જોવાનો કોઈ અર્થ નથી.
હું લખું અને તું વાંચી ના શકે,
અને કદાચ વાંચે તો સમજી ના શકે,
એવી મારી આ ગઝલનો કોઈ અર્થ નથી.
નીરજ (સાવર કુંડલા)