સાચું કહું તો તારી આંખ બહુ ગમે છે,
શબ્દ વગરની એ વાત બહુ ગમે છે,
તાકીને તાકીને એકદમ જોઈ રહે ત્યારે,
વધેલી ધડકનનો અવાજ બહુ ગમે છે
સાચું કહું તો...
લહેરાતી લટ સાથે ઉડવું બહું ગમે છે,
અંગોનો અનંગી વળાંક બહુ ગમે છે,
ચહેરેથી ટપકતા ટપકતા મેઘબિંદુને,
હાથમાં હળવેથી ઝીલવું બહુ ગમે છે
સાચુ કહું તો...
ટહુકતી કોયલ જેવો સાદ બહુ ગમે છે,
કુદરતી ફુલોનો શૃંગાર બહુ ગમે છે,
વરસાદી માહોલમાં વીજળીના ચમકારે,
તારા સૌંદર્યનો દીદાર બહુ ગમે છે
સાચુ કહું તો...
રીસાવું પણ ગમે છે, મનાવવું પણ ગમે છે,
વિરહમાં તારા બળવું પણ ગમે છે,
નથી પરિપૂર્ણ કોઈ દુનિયામાં 'પાગલ'
તારી સાથેનો અનંત પ્રવાસ બહુ ગમે છે.
સાચું કહું તો...
ડો. પ્રણવ ઠાકર
(વઢવાણ)
No comments:
Post a Comment